Sionist İsrailin xarici işlər naziri Gideon Saar martın 23-də Qəzza zolağının Rəfah şəhərində işğalçı İsrail əsgərlərinin hədəfə aldığı təcili yardımı "xəbərdarlıqlara məhəl qoymayan bir avtomobil" kimi xarakterizə edərək hücumu müdafiə edib.
Az.rasthaber.com xəbər verir ki, Saar regional inkişafları qiymətləndirmək üçün beynəlxalq media mənsublarının da qatıldığı mətbuat konfransı keçirib.
İsrail ordusunun beynəlxalq qanunlara zidd olaraq yaralılara kömək etmək üçün Rəfah bölgəsinə gedən təcili yardım maşınına atəş açması ilə bağlı Saar deyib:
"İsrail ordusu təcili yardıma təsadüfi hücum etməyib. Keçən bazar günü koordinasiya olunmayan bir neçə avtomobilin heç bir xəbərdarlıq və ya qəza işıqları olmadan İsrail ordusu birliklərinə doğru şübhəli şəkildə irəlilədiyi təsbit edildi".
Saar Qəzza zolağının cənubundakı Rəfah şəhərindən fələstinlilərin sürgün edilməsi ilə bağlı suala "İsrail ordusu mülki insanları qorumaq üçün təxliyyə əmri verib və bunun beynəlxalq hüquqa uyğun olduğunu" deyib.
Saar, ABŞ prezidenti Donald Trampın Qəzzada fələstinliləri tamamilə deportasiya etmək planının hələ də müzakirə mövzusu olduğunu və bunun həyata keçirilməsi üçün yaradılan komitə üzərində işləməyə davam etdiklərini bildirib.
Digər tərəfdən Saar, atəşkəsə baxmayaraq Livana hücumlarını davam etdirən İsrail ordusunun bu səhər bir daha Beyrutu hədəf aldığını bildirib.
Fələstin Qızıl Aypara Cəmiyyətinin martın 23-də verdiyi açıqlamada, Rəfahdakı hücumda yaralananları xilas etmək üçün bölgəyə göndərilən 4 təcili yardım maşını və ekipajının İsrail ordusu tərəfindən mühasirəyə alındığı, hücumda bəzi tibb işçilərinin də yaralandığı bildirilib.
Qəzzadakı Mülki Müdafiə Bölməsi də həmin gün Fələstin Qızıl Ayparasından həkimləri xilas etmək üçün yola çıxan qruplarla əlaqəni itirib.
Qəzzada Fələstin Səhiyyə Nazirliyindən verilən açıqlamada, Rəfahda hədəf alınan və cansız bədənləri tapılan bəzi şəxslərin əllərinin bağlandığı, başlarının və sinələrinin güllələndiyi, dərin bir çuxura basdırıldığı bildirilib.
Sionist İsrail ordusu isə martın 23-də Qəzza zolağının Rəfah şəhərində həyata keçirdiyi hücumda yaralıları xilas etmək üçün bölgəyə gələn təcili yardım və yanğınsöndürən maşını hədəfə aldığını etiraf edib.
BMT Baş Katibinin Humanitar Məsələlər üzrə Müvəkkili və Fövqəladə Yardım Koordinatoru Tom Fletcher dünən verdiyi açıqlamada, Qəzzada İsrail tərəfindən öldürülən və cəsədləri maşınlarının yanında tapılan 15 səhiyyə və humanitar yardım işçisi üçün "məsuliyyət və ədalət" tələb etdi.
