İraqın baş naziri Məhəmməd əl-Sudani İsrail rejiminin İrana qarşı hücumlarında İraqın hava məkanından istifadə etməsini kəskin şəkildə pisləyib.

Az.rasthaber.com xəbər verir ki, sionist rejim İran ərazisinə bir çox hücumlarda İraqın hava məkanını pozub.

Bu vəziyyət Bağdad rəhbərliyinin reaksiyasına səbəb olub.

Baş nazir Sudani məsələ ilə bağlı açıqlama verərək deyib:
"İsrail rejiminin İraqın hava məkanını pozması ölkəmizin suverenliyinə hücumdur və Birləşmiş Millətlər Təşkilatı Nizamnaməsini açıq şəkildə pozur. Bu çərçivədə BMT Təhlükəsizlik Şurasına rəsmi şikayət etmişik".

İraqın balanslaşdırılmış diplomatiya ardınca getdiyini ifadə edən Sudani deyib:

"Bölgədəki vəziyyətin təhlükələri ilə bağlı dostlarımıza açıq mesajlar verdik. İraqın suverenliyi müzakirə mövzusu deyil".

ABŞ və İsrail rəsmilərinin aqressiv ritorikasına diqqət çəkən Sudani, “İran İslam Respublikası rejimini devirməyə yönəlmiş istənilən cəhdin bütün region üçün təhlükəli nəticələri olacaq” deyə xəbərdarlıq edib.

İraqın baş naziri həmçinin bəyan edib ki, müharibə genişlənərsə, İraqın təhlükəsizliyini və sabitliyini təhdid edəcək və onun enerji təchizatı və neft ixracına mənfi təsir göstərəcək.